Tam bir gecə yuxusundan sonra tez-tez yorğun hiss etmək bir sıra səbəblərdən asılı ola bilir. Lakin ən çox rast gəlinən səbəblərdən biri vitamin çatışmazlığıdır. Orqanizmimizin yaxşı işləməsi üçün vitamin və mineral balansına ehtiyacı vardır. Müəyyən vitaminlər əskik olduqda isə özümüzü yorğun, ləng hiss edə və diqqət problemləri yaşaya bilirik.

"Kanal14.az" yorğun hiss etməyimizə səbəb olan vitamin çatışmazlıqlarını təqdim edir:

Dəmir əksikliyi:

Bədənimizdəki oksigeni dəmir daşıyır. Dəmir çatışmazlığı olduqda, qırmızı qan hüceyrələri əzələlərimizə və toxumalarımıza kifayət qədər oksigen təmin edə bilmir.
Anemiya, tez-tez yorğunluq, başgicəllənmə və nəfəs darlığı ilə özünü göstərən aşağı dəmirə səbəb olan xəstəlikdir.

D vitamini əksikliyi:
D vitamini enerjinin tənzimlənməsində və əhval-ruhiyyənin tarazlığında mühüm rol oynayır. Bu vitamin bədəndə kifayət qədər olmadıqda, özümüzü əzgin və ya depressiyada hiss edirik. Günəş işığı D vitamininin əhəmiyyətli bir qaynağı olduğundan, vaxtının çoxunu qapalı yerlərdə keçirənlər daha çox risk altındadır. D vitamini səviyyəsinin aşağı olması yorğunluğa və əzələ zəifliyinə səbəb olur.

B12 vitamini çatışmazlığı:
Qırmızı qan hüceyrələrinin istehsalı və sinir funksiyalarının hamısı B12 vitaminindən asılıdır. Bu vitaminin kəskin çatışmazlığı əhval-ruhiyyənin dəyişməsinə, yaddaş problemlərinə və həddindən artıq yorğunluğa səbəb ola bilir.

Maqnezium əksikliyi:
Maqnezium enerji istehsalı və əzələ funksiyası da daxil olmaqla yüzlərlə bədən funksiyasında rol oynayır. Aşağı maqnezium səviyyələri yorğunluq, əsəbilik və əzələ ağrılarına səbəb ola bilir.

Folat əksikliyi:
B9 vitamini olaraq da bilinən fol turşusu DNT istehsalı və hüceyrə böyüməsi üçün vacibdir. Hamilə qadınlar üçün xüsusilə əhəmiyyətlidir, həmçinin, hər kəsin enerji səviyyələrində də mühüm rol oynayır. Folat çatışmazlığı yorğunluğa, konsentrasiya pozğunluqlarına və əsəbiliyə səbəb ola bilir. Daha çox göyərti, lobya və sitrus meyvələri yeyərək folat səviyyəsini artırmaq mümkündür. Bəzi hallarda fol turşusu əlavəsi lazım gələ bilir.