Azərbaycanda uzun illər iqtidar-müxalifət dialoqu, görüşləri ATƏT-in Bakı ofisinin, ABŞ səfirliyinin, başqa beynəlxalq təşkilatların vasitəçiliyi ilə keçirilirdi. Amma son ilyarımda bu missiyanı Azərbaycan dövləti öz üzərinə götürüb. Prezident Administrasiyasında Siyasi partiyalarla və qanunverici hakimiyyətlə iş şöbəsi yaradıldıqdan sonra şöbənin müdiri Ədalət Vəliyevlə ölkədə fəaliyyət göstərən siyasi partiyaların, ictimai qurumların rəhbərləri arasında görüşlər keçirilir.

Artıq bu sahədə xeyli irəliləyiş əldə edilib. Bu, 44 günlük müharibə dönəmində də özünü göstərdi.

Yeni Azərbaycan Partiyası təşkilat şöbəsinin müdiri, deputat Aydın Hüseynov bu barədə "Yeni Müsavat”a açıqlamasında bildirdi ki, kənar qüvvələrin vasitəçiliyi olmadan keçirilən dialoqun, görüşlərin ölkə və siyasi qüvvələrin özləri üçün daha uğurlu olduğu birmənalıdır: "Azərbaycan Prezidenti İlham Əliyevin ölkədə apardığı islahatlar sözügedən sahəni də əhatə edib və çox müsbət nəticələr göz önündədir. Cənab Prezident ölkədə yeni siyasi konfiqurasiyanın qurulmağa başladığını xeyli öncədən elan etmişdi. Struktur islahatları çərçivəsində Prezident Administrasiyasında Siyasi partiyalarla və qanunverici hakimiyyətlə iş şöbəsinin yaradılması ilə yeni siyasi konfiqurasiyanın, hakimiyyətlə siyasi partiyalar arasında münasibətlərin yeni mərhələyə keçməsinin praktiki əsası qoyuldu. Bu praktika Azərbaycanda çox uğurla həyata keçir. Azərbaycanda siyasi partiyaların həyatında bir canlanma, yenilik, aktivlik yaranıb.

Eyni zamanda ölkəmizlə, partiyaların özləri ilə bağlı məsələlər heç bir kənar vasitəçi olmadan hakimiyyət-siyasi partiyalar dialoqunda müzakirə edilir. Keçirilən görüşlərin, müzakirələrin müsbət effekt verdiyi məlumdur. Biz istənilən problemi də artıq öz aramızda özümüz müzakirə edərək yoluna qoyuruq. Dövlətimizin inkişafı, milli birliyimiz üçün bu çox ciddi amildir. Vətən müharibəsində 52 siyasi partiyanın vahid mövqe ortaya qoyması keçirilən görüşlərin, yeni siyasi konfiqurasiyanın ən yaxşı effekti idi. Eyni zamanda çoxlu sayda partiyaların dövlət qeydiyyatına alınması, bir qrup müxalifət partiyasına qərargah üçün ofisləri ayrılmasını da qeyd etmək istəyirəm. Azərbaycanda kənar vasitəçi olmadan iqtidarla siyasi partiyaların dialoqu cəmiyyət tərəfindən də dəstəklənir. Biz pandemiya dövründə belə, internetin verdiyi imkanlardan yararlanıb dialoqu davam etdirdik və etdiririk. Bu prosesdə uğurlu kadr kimi cənab Ədalət Vəliyev çox gözəl nümunələr ortaya qoya bilib”.

Milli Dirçəliş Hərəkatı Partiyasının sədri Fərəc Quliyev bildirdi ki, Azərbaycanın vasitəçilərdən son 30 ildə xeyir görmədiyi, öz işlərimizi özümüzün həll etməyimizdən daha çox fayda götürdüyümüz artıq sübuta yetib: "Xüsusilə son 44 günlük müharibədə bu, tam sübuta yetirildi. 30 ilə yaxın idi Minsk Qrupu bizə vasitəçilik edirdi və heç bir müsbət effekti yox idi. Azərbaycan özü məsələni həll elədi. İkincisi, Azərbaycanda siyasi palitrada münasibətlərin tənzimlənməsi bizim öz daxili işimizdir. Azərbaycan bir ailədir, İstanbulun əhalisinin yarısı qədər əhalisi olan ailə. Burada siyasi, ictimai məsələlərdə, münasibətlərdə hansısa xarici qüvvələrin vasitəçilik eləməyinə heç bir ehtiyac yoxdur. Üstəlik də hakimiyyətlə siyasi partiyalar arasında müzakirələrdə elə məsələlər ola bilər ki, onlar dövlət sirri xarakteri daşıyar, elə məsələlər olar sırf hakimiyyətlə siyasi partiyanın, müxalifətin arasında bilinməli olan məsələ olar. Ona görə də xarici vasitəçinin təşkilatçılığı ilə baş tutan görüşlərin bu baxımdan da zərəri var. Azərbaycanda son zamanlar reallaşan dialoq doğru seçimdir, daha effektlidir. Burada kənar vasitəçi yoxdur, özümüzün apardığımız dialoqdur. Başqasına ehtiyac yoxdur. Üstəlik də Prezident Administrasiyasında yeni şöbənin yaradılması cənab Prezidentin iradəsidir. Şöbənin müdiri Ədalət Vəliyev kimi kadr da çox uğurlu bir kadrdır. Yəni hər kəs bu işin öhdəsindən gələ bilməz. Cənab Ədalət Vəliyev çox ünsiyyətcil, hər kəslə dil tapmağı bacaran və işini bilən kadrdır. Onun həmin şöbəyə rəhbərlik etməsi çox yaxşı effekt verir. 44 günlük müharibədən öncə hakimiyyətlə siyasi partiyalar arasında keçirilən görüşlərin, dialoqun müharibə dövründə effekti özünü göstərdi. 52 partiya ortaya ortaq mövqe qoydu, milli birlik nümayiş etdirildi. Əlbəttə, müxalifətin hansısa çatışmazlıq hesab etdiyi məsələlərə iradları, etirazları ola bilir və bu təbiidir. Bunun üçün də kənardan heç kimin vasitəçiliyinə ehtiyac yoxdur. Dialoqda müxalifət partiyalarının rəhbərləri fikirlərini birbaşa hakimiyyət rəsmisinə çatdırırlar. Digər tərəfdən, mən heç vaxt düşünməmişəm ki, hansısa beynəlxalq təşkilatda olanlar bizim insanımızdan daha ağıllı, daha ortaq məxrəcə gətirməyi bacaran personalardır. Bizim bütün kadrlarımız hər mənada onlardan üstündür. Ona görə də bu seçim doğrudur və nəticələr də ortadadır. Ona görə də davam eləmək lazımdır. Ölkəmizdə olan hər hansı çatışmazlıqlar məhz özümüz tərəfindən həll edilməlidir, qarşılıqlı dialoqla müzakirə olunmalıdır. Elə məsələlər var ki, qapalı da müzakirə aparılmalıdır. Bütün bunlarda xarici instansiyaların iştirakına ehtiyac yoxdur”.

Böyük Azərbaycan Partiyasının sədri Elşad Musayev isə bildirdi ki, təcrübə ölkədə siyasi qüvvələr arasında münasibətlərin pis olmasının çoxlu problemlərə gətirdiyini dəfələrlə ortaya qoyub: "İllərlə davam edən inkarçılq, düşmən münasibət nəticəsində siyasi məhbus problemi yarandı, beynəlxalq təşkilatlar da əsasən bu problemin çözülməsi ilə məşğul oldu. İqtidarla müxalifət faktiki beynəlxalq təşkilatlar vasitəsilə bir araya gələ bilirdi, yaxud bəzi siyasi partiyalarla hakimiyyət arasında gizli əlaqələr qurulurdu. Lakin bu, heç də vəziyyətin düzəlməsinə gətirmirdi. İndi Ədalət Vəliyevin rəhbərlik etdiyi Siyasi partiyalarla və qanunverici hakimiyyətlə iş şöbəsi fəaliyyətə başlayandan sonra hakimiyyətlə siyasi partiyalar arasında normal münasibətlər yarandı, 44 günlük Vətən müharibəsində isə yüksək səviyyədə siyasi əməkdaşlıq nümayiş olundu. Bunun da qələbəmizə əhəmiyyətli bir dəstək olduğunu düşünürəm. Fikrimcə, ölkəmizin gələcəyi və inkişafı üçün iqtidarla müxalifət arasında normal münasibətlərin və demokratik, ədalətli rəqabətin olması vacib şərtdir və biz bu yolu getməliyik. Kənar vasitəçilərsiz bu yol daha uğurludur”.
"Yeni Müsavat”