Rus hakerlər Ukraynanın "Burisma” şirkətinin serverlərini sındırararaq onun internet səhifəsini ələ keçiriblər.

 Kanal14  musavat.com-a istinadən xəbər verir ki, bu barədə "The New York Times” qəzeti məlumat yayıb.

Qeyd olunur ki, "Burisma” şirkətində vaxtilə keçmiş vitse-prezident Co Baydenin oğlu Hanter Bayden də çalışıb. Məhz onun buradakı fəaliyyətinin araşdırılması üçün ABŞ prezidenti Donald Tramp öz adamı Rudi Culianini Ukraynaya göndərib və üstəlik, rəsmi Kiyevə H.Bayden haqqında cinayət işinin açılması üçün təzyiq göstərib. Bu isə Donald Trampa qarşı Nümayəndələr palatasında impiçment prosedurunun başladılmasna gətirib çıxarıb.

Qəzetin yazdığına əsasən, şirkət serverinə daxil olunması cəhdləri hələ ötən ilin noyabr ayından başlanlıb. Burada əsas məqsədin Co Baydenin oğluna qarşı kompromat xarakterli informasiyaların ələ keçirilməsidir.

Qəzet Milli təhlükəsizlik agentliyindəki mənbələrinə istinadən kiber hücumların ən sonda müvəffəqiyyətlə nəticələndiyini bildirib.

Gələn informasiyalarda hücumun arxasında birbaşa Rusiya Baş Kəşfiyyat İdarəsinin durduğu göstərilir. Hakerlər "Burisma”nın törəmə müəssisələrinə göndərilən saxta elektron poçt vasitəsilə serverə daxil olmağı bacarıblar.

Rusiya hakerlərinə qarşı ABŞ hüquq-mühafizə orqanları 2018-ci ildən başlayaraq cinayət işi açıb və konkret 12 nəfərə qiyabi ittiham irəli sürülüb.

Ötən ilin dekabr ayında ABŞ Maliyyə nazirliyi 17 fiziki şəxsə, 5 Rusiya şirkətinə və "Evil Corp.” haker qruplaşmasına qarşı ittiham aktı hazırlayıb. Onlar dünyanın 40 ölkəsində yerləşən banklardan 100 milyon dollar pul oğurlamaqda təsqirləndirilirlər.