Bu sözləri Axar.az-a Qaşıqçı olayına görə İran-Səudiyyə savaşının başlaya biləcəyi ilə bağlı iddialara münasibət bildirən politoloq Əhəd Məmmədli deyib. O bildirib ki, ABŞ-ın bu müharibəni başlaması üçün Səudiyyə Ərəbistanına dəstək verməsi inandırıcı görünmür:

"Səudiyyə Ərəbistanı Yəməndə üsyançı husilərin öhdəsindən gələ bilmir, İranla necə müharibə edəcək?! Odur ki, Səudiyyə Ərəbistanı bu cür riskə gedə bilməz. Ordunun müasir silahlarla təchiz olunması hələ həmin ordunun güclü olması anlamına gəlmir. Səudiyyə Ərəbistanının ordusu Yəmən müharibəsində zəif olduğunu göstərdi. Orduda zabit, əsgər heyətinin ruh yüksəkliyi və peşəkarlığı müasir müharibələrdə də ən önəmli cəhətdir. Yəməndə Səudiyyə Ərəbistanı tərəfində muzdlular vuruşur. Muzdlu orduyla uzağa getmək olmaz. İran ordusu Səudiyyə ordusundan daha güclü, peşakardır. İran ordusunun zabit, əsgər heyətinin ruh yüksəkliyi Səudiyyə Ərəbistanı ordusundan daha yüksəkdir”.

Politoloq vurğulayıb ki, ABŞ Səudiyyə Ərəbistanına silah satsa da, müasir silahlarının işlənmə kod və parollarını ərəblərə vermir:

"Eyni zamanda, Qərbə tarix boyu İran lazım olub, indi də lazımdır. Tarixdə heç vaxt görülməyib ki, Avropa İrana səlib yürüşü etsin. İranın varlığı Qərb üçün islam dünyasının parçalanmasına şərait yaradır. Qərb İranı zəiflədə bilər, ancaq heç vaxt İranın məhv edilməsi yolunu seçməz. Yuxarıda qeyd qeyd etdiyim faktlara söykənərək söyləyə bilərəm ki, Amerikanın dəstəyi ilə Səudiyyə Ərəbistanının İrana müharibə elan edəcəyi tezislərinə heç vaxt ciddi yanaşmamışam”.

Qeyd edək ki, türkiyəli ekspert Yasin Atlıoğlu Səudiyyə vəliəhdi Məhəmməd bin Salmanın ABŞ-ın dəstəyi ilə İranla müharibəyə başlaya biləcəyi iddiası ilə çıxış edib.