Dünən Novruz bayramı münasibətilə AMEA işçilərə 96 manat 14 qəpik mükafat verib. İndicə aldığım dərmanların üçdə birinin qiyməti 79 manat 68 qəpik etdi. Maaşın yarısı isə yarımçıq müayinəyə gedib.
Bəli, hər şey ala-yarımçıq, sınıq-salxaq...
Elmin inkişafından danışan, pula pul deməyən, sinxron olaraq Baş akademik, deputat, vitse, direktor və s. kimi vəzifələri tutan İsa Həbibbəyli və onun əli pulla oynayan homoloqları 96 manat 14 qəpiklə, görəsən, neçə saat yaşaya bilərlər?!
Keçən il Tibbi sığortadan çəkdiyimizi çəkdik. Uşağın MRT müayinəsinə göndəriş vermək üçün olmazın işgəncələrini verdilər. Bir həftə get-gəl! Hələ yarı pulu da pasiyentdən aldılar!
Tibbi sığorta deyəndə süründürməçi simalar göz önündə canlanır. Hər ay yetimçə maaşımızdan sığorta pulu tutsalar da, poliklinikalarda verdikləri psixoloji travmalara görə bu xidmətdən yararlana bilmirik.
Görmüşük ki, xəstəyə qayğı göstərərlər, bizdə isə, əksinə, xəstəyə mənfi psixoloji təsir göstərirlər.
Milləti ümidsizləşdirən belə özbaşınalıq və ədalətsizliklər var-döv-lətləri başlarından aşan filoloq və Baş akademik İsa Həbibbəylini, onun akademik həmkarı təbib Əhliman Əmiraslanovu, varlanmış akdademikləri, özünü tutmuş Baş yazar Anarı və digər adlı, titullu, mallı, mülklü, adlı-sanlı "elm, ədəbiyyat və sənət fədailəri"ni heç maraqlandırırmı?!
Millətin hazırkı durumu özünü vaxtilə millət fədaisi kimi göstərmiş və xalqın yazıçısı kimi işıldamış Ramiz Rövşənin də heç vecinə deyil. Millətsevərlik, xalqsevərlik, vətənsevərlik - hamısı özünü tutana kimi imiş! Elədirsə, onda o faydasız şeirlər, nağıllar kimə gərəkdir və nəyə çarədir? Sosial ədalətsizliyin qurbanı olan millət balalarının yarasına kiçik bir məlhəm oldunuzmu?! Heyhat!
Bu şəxslər xalqın sevgisini istismar edib özlərini tutduqdan sonra xalqı yarıyolda qoyub qaçdılar. Pul, vəzifə, mülk qara qan kimi gözlərini örtdü, bəsirətlərini axtaladı!
Vecsizlik məhv etdi və etməkdədir!
PS. Mən, əsasən, keçən əsrdə yazıb-yaratmış M. Müşfiq, C. Cabbarlı, M. İbrahimov, B. Vahabzadəni və onlarla digərlərini oxusam da, yaxşı ki, vecsizlərin əsərləri vecimə olmayıb.//dia.az