BMT İnkişaf Proqramı Türkiyədə dağıntıların aradan qaldırılması fəaliyyətlərinə dəstək verəcək
"Kanal14.az" "haberglobal"a istinadən xəbər verir ki, Birləşmiş Millətlər Təşkilatının İnkişaf Proqramı (UNDP) Türkiyədə baş verən zəlzələlərin səbəb olduğu dağıntıların aradan qaldırılması səylərinə dəstək verəcək.
Proqramdan verilən açıqlamada, Birləşmiş Millətlər Təşkilatının (BMT) fevralın 16-da Türkiyəyə açıqladığı 1 milyard dollarlıq "təcili yardım çağırışı” çərçivəsində dağıntıların təmizlənməsi fəaliyyətləri üçün tələb olunan 113,5 milyon dollarlıq fondun böyük hissəsinin istifadə ediləcəyi bildirilib.
Bəyanatda bildirilib ki, BMTİP hökumətin fəaliyyətinə dəstək vermək üçün ekoloji cəhətdən təmiz dağıntıların idarə edilməsi yanaşmasını həyata keçirməyi qarşısına məqsəd qoyub və dağıntıları çıxarıb harasa atmaq əvəzinə dağıntıların tərkibində olan xammalın təkrar emal edilməsi planlaşdırılır.
Bəyanatda əlavə olunub ki, BMT-nin İnkişaf Proqramı həmçinin dağıntıları çıxarmaq və emal etmək üçün yerli sakinləri işə cəlb etməklə dolanışıq vasitələri yaratmağa çalışacaq.
Bəyanatda BMT-nin İnkişaf Proqramının Türkiyə Rezident Nümayəndəsi Luiza Vintonun da fikirləri yer alıb.
"BMT İnkişaf Proqramında diqqətimizi erkən bərpaya yönəltmişik. Fövqəladə hallara cavab tədbirlərini dəstəkləməklə yanaşı, regionda həyatı normallaşdırmaq üçün lazım olan genişmiqyaslı işləri də planlaşdırırıq. Dağıntıların təmizlənməsi çox vacib ilk addımdır. Lakin, bunu edərkən dağıntılar altında qalan həyatlara və arzulara hörmət etməliyik” - deyə, Vinton bildirib.
"Çətinliyin əhatə dairəsi insan ağlından kənardır." Vinton öz qiymətləndirməsində təxmin edilən dağıntı sahəsinin ölçüsünün ABŞ-ın Nyu-York şəhərində 59 kvadrat kilometr ərazini əhatə edən Manhetten adasından daha böyük olduğunu bildirdi.
BMTİP-in ilkin hesablamalarına görə, zəlzələlər nəticəsində 116-210 milyon ton dağıntı əmələ gəlib. Gölcük zəlzələsində təxminən 13 milyon ton dağıntı meydana gəldi.
Bildirilib ki, fövqəladə hallara müdaxilə qruplarına da töhfə verən BMTİP Hatay Böyükşəhər Bələdiyyəsinə 160 770 litrlik zibil qabı, 54 ton sönmüş əhəng və 10 min litr dezinfeksiyaedici vasitə çatdırıb.
Kanal14.az
Kamal Əsgərov
