Digər pedoqoqlardan fərqlənən müəllimə- Foto/Video
Əvvəlki illərə nisbətən son dövrlər təhsil sahəsində bir sıra böyük nailiyyətlər əldə olunmuşdur. Buna misal olaraq qeyd etmək olar ki, cəmiyyətdə savadlı müəllim və müəllimələrin işə cəlb olunması üçün MİQ imtahanlarının şəffaf qaydada keçirilməsi böyük addımlardan hesab olunur. Məlumdur ki, savadlı cəmiyyətin olması üçün ilk növbədə təhsilin xüsusi rolu var. Məhz bu səbəbdəndə biz DogruXeber.az informasiya agentliyi olaraq, Təhsil Nazirliyinin bu cür təqdirə layiq keçirdiyi imtahan metodlarını dəstəkləyirik.
Elə bu səbəbdəndir ki, rayonların ucqar kəndlərində yaşayan əhalinin təhsildən kənarda qalmaması cəmiyyətin savadlı olmasının bariz nümunəsidir. Bu gün sizlərin diqqətinə çatdıracağımız şəxs məhz ucqar kəndlərin birində müəllimə işləyən Zeynəb xanım barəsində olacaq. 1993-cü ildə Lənkəran şəhərində anadan olmuş və orta təhsilini yüksək qiymətlərlə başa vuraraq, 2014-cü ildə Lənkəran Dövlət Universitetinin Riyaziyyat-İnformatika fakültəsinə daxil olmuşdur. Hələ uşaqlıq vaxtlarından pedoqoji sahədən kənar olan peşələrə maraq göstərməsi və hətta pilot olmaq belə arzusunda olan Zeynəb xanım valideynlərinin istəyini ali tutaraq, müəlliməlik peşəsinə yiyələnmişdir. Universiteti bitirdikdən sonra MİQ imtahanlarında özünü sınayaraq, keçid balını toplamağa nail olmuş və beləliklə Quba rayonunun ucqar bölgəsi olan Cimi kəndinin tam orta məktəbində pedoqoji fəaliyyətə başlamışdır.
Həmsöhbət olduğumuz Zeynəb xanımın fikirlərində başqalarına nisbətən fərqli olması bizim bir anlıq diqqətimizi cəlb etdi. Belə ki, Zeynəb xanımı başqalarından fərqləndirən xüsusiyyət odur ki, hər kəs mərkəz ərazilərdə çalışmaq istədiyi halda o, rayonun ucqar kəndində fəaliyyət göstərməsindən məmnun olduğunu qeyd etdi. Bu isə digər pedoqoqlarımıza nümunədir. Düşünürük ki, bu cür gənc pedoqoqların ucqar rayonlarda dərs fəaliyyəti ilə məşğul olması üçün Təhsil Nazirliyi tərəfindən hər hansı bir maddi şəraitin yaradılması təmin olsa bölgələrdə təhsil səviyyəsinin günü-gündən artması müşahidə olunar.
Bu baxımdan, müsahibimizin yaşam şəraiti ilə tanış olduğumuz vaxt, onun bəzi narazılıqlarının olduğunu hiss etdik. Məlumdur ki, Təhsil Nazirliyi tərəfindən müəllimlər üçün müəyyən konpensasiya ayrılmışdır. Bu isə müəllimlərin fəaliyyət göstərdikləri ərazidə yaşam səviyyəsinin qismən təmin olunması üçündür. Müsahibimizin bildirdiyinə görə, qış ayları onlar üçün çətin aylardan hesab olunur. Belə ki, kommunal xərclər soyuq aylarda yüksək məbləğə başa gəldiyi üçün verilən kompensasiya bir çox vaxtlarda kifayət etmir. Bu isə ucqar rayonlarda fəaliyyət göstərən pedoqoqların maddi baxımdan əziyyət çəkməsi ilə nəticələnir. Ümid edək ki, gələcəkdə Təhsil Nazirliyi tərəfindən ucqar bölgələrdə fəaliyyət göstərən pedoqoqlar üçün yataqxana tipli yaşayış mərkəzləri inşa edilər və pedoqoqların yaşam problemləri həll olunar.
DogruXeber.az
