Müasir Müsavat Partiyasının sədri Hafiz Hacıyev əmisi nəvəsi olan ictimi fəal Bəxtiyar Hacıyevin Nərmin Şahmarzadə və digər aktivistlərlə mesajlaşmalarının yayılmasından danışıb.

Hafiz Hacıyev Demokrat.az-a açıqlamasında bildirib ki, Bəxtiyar Hacıyev nəsilin adına ləkə gətirən fəaliyyətlə məşğul olur:

"Əgər həmin əxlaqsız yazışmalar Bəxtiyar Hacıyevə məxsusdursa, o zaman bu şəxs nəslimizin başını yerə soxub. Çox təəssüf edirəm ki, Bəxtiyar Hacıyev o soyadı daşıyır. Bizim nəsil çox böyükdür, təqribən yarım milyona yaxındır. İndi Hacıyev nəslindən olan bir adamın gedib o cür əxlaqsız qruplara qoşulmasına görə şəxsən mən özümə nifrət edirəm. Arada özümə sual verirəm ki, axı niyə Hacıyev nəslindən bu cür mənəviyyatsız insanlar ortaya çıxır? İnsan ac, pulsuz ola bilər. Bu gün mən də kasıbam, dişimi düzəltdirməyə belə pul tapa bilmirəm, ancaq öz əqidəmdən əsla dönmürəm, İlham Əliyevin yoluna sadiqəm".

Hafiz Hacıyev iddia edir ki, qohumu Bəxtiyar Hacıyev AMEA-nın prezidenti Ramiz Mehdiyev tərəfindən himayə olunur:

"Ramiz Mehdiyev hər ay Bəxtiyar Hacıyevə pul göndəriri, ona şəhərin mərkəzində bahalı ofis verib. Əvəzində isə Bəxtiyar Hacıyev Ramiz Mehdiyevin tapşırıqlarını icra edir. İndi tez-tez Harvardın məzunlarını misal çəkirlər. Ancaq biz Harvardı bitirib vəzifəyə qoyunları da gördük. Onlar da özlərini doğrultmadılar. Bəxtiyar Hacıyev kimi bir qrup var, gedib Harvardın saxta diplomunu əldə edib, sonra gedib əxlaqsız işlərlə məşğul olurlar. Yəni, haranın məzunu olmağın heç bir əhəmiyyəti yoxdur, əsas adam olmalısan. Biz heç zaman imkan vermərik ki, bu cür adamlar dövlətçiliyi, milli dəyərləri dağıtsınlar".

Sözügedən ittihamlarla bağlı Bəxtiyar Hacıyev isə danışmaq istəmədiyini bildirib.