Sərt karantinin yumşalması ilə bağlı qərar veriləndən sonra təhsil müəssisələrinin açılıb-açılmayacağı ilə bağlı məsələ gündəmə gəlib.

Məlum olduğu kimi, yanvarın 22-də Təhsil naziri Emin Əmirullayev brifinq keçirərək, məsələyə aydınlıq gətirəcək. Hələ ki, hansı qərarın veriləcəyi bəlli olmasa da, ictimaiyyətdə müxtəlif fikirlər mövcuddur.

Təhsilin səviyyəsinin geriləməsini əsas gətirərək məktəblərin, o cümlədən də ali və orta ixtisas müəssisələrinin açılmasının tərəfdarı olanlar da var. Amma böyük əksəriyyət, xüsusilə də valideyinlər bunun narahatlığını yaşayırlar.

Belə ki, rəsmi olaraq yoluxma sayının xeyli azaldığı açıqlansa da, yolxuma faktı təsdiqlənməyənlər, yəni test etdirməyənlər, evdə özü hiss etdiyi əlamətlərə görə tanış həkim vasitəsilə müalicə olunanlar dəfələrlə çoxdur. Demək olar ki, hər kəsin ətrafında koronavirusa yoluxduğu ehtimal olunan, amma test olunmayan və xəstəliyi evdə keçirən şəxslər var. Digər tərəfdən, hazırda SMS-icazəsinin ləğv olunduğu, bəzi qadağaların götürüldüyü bir vaxtda sərnişindaşımda olan problemlər aradan qaldırılmayıb.

Metropolitenin fəaliyyəti bərpa olunmayıb, yerüstü nəqliyyat vasitələrində isə sıxlıq davam etməkdədir. Bu isə yoluxmanı artıran amillərdəndir. Məlumdur ki, mənzil başına daha sürətli çatmaq üçün metro daha əlvrişli nəqliyyat növüdür. Yollardakı tıxacları nəzərə alsaq, metronun 10 dəqiqəyə getdiyi yolu avtobusla bir saata ancaq getmək mümkündür. Bu isə həm də potensial virus daşıyıcıları ilə daha uzun müddət bir ortamda olmaq, daha çox yoluxma imkanı deməkdir.

Belə bir vəziyyətdə məktəblər təhlükə mənbəyinə çevirilə bilər. Koronavirus uşaqlar üçün təhlükəli hesab olunmasa da, hər halda onlar daşıyıcı olurlar və şagirdlərin bir qisminin ailəsində yaşlı, xəstə, immuniteti zəif olan şəxslərin olması təbiidir.

Digər tərəfdən, əgər əvvəl olduğu kimi hibrid forma seçilərsə, bu da təhlükənin azalması demək olmayacaq. Ailədə iki və daha artıq şagird övladı olan valideynlər onları növbəli qaydada məktəbə aparıb-gətirəndə daha çox problemlə üzləşəcəklər.

Cebhe.info-ya açıqlama verən professor Adil Qeybulla hesab edir ki, Abşeron yarımadasında əhalinin böyük əksəriyyəti koronavirusa yoluxub:

"Əgər bizdə vaksinasiya da başlanarsa, bir ay yarımdan sonra kollektiv immunitetə yaxın ola bilərik. Hətta vaksinasiya prosesi gedən müddətdə də koronavirusdan tam xilas olmaq mümkün deyil. Tam immunitet fomalaşana qədər maska taxılmalı, məsafə saxlanılmalı və digər qaydalara əməl edilməlidir. Bu da təxminən 1 ay yarım - 2 ay vaxt tələb edəcək. Əhalinin yoluxmayan hissəsinin də vaksinasiya olunması respublikada tam kolektiv immunitetin formalaşmasına gətirib çıxara bilər. Hər halda Azərbaycan özünü bu yolla xilas edə bilər. Bundan sonra biz artıq kütləvi tədbirlərə başlaya, sosial həyatı sərbəst formada davam etdirə bilərik. Həm dərslər başlaya, həm metro açıla bilər. Bütün bunlar vaksinasiyanın müəyyən səviyyəsindən sonra mümkündür”.

Təhsil Nazirliyi yanında İctimai Şuranın sədri Şahlar Əsgərov isə Cebhe.info-ya açıqlamasında bildirib ki, məktəblərin açılmasının tərəfdarıdır:

"Dərslər nə qədər tez başlasa, o qədər yaxşıdır”.