Dünya

Koçaryan hədələdi: “Əlimdə Mart qırğını ilə bağlı video var”

Koçaryan hədələdi: “Əlimdə Mart qırğını ilə bağlı video var”
 
 
 
 
 
 
 
 
 
 
 
 
 
 
 
 
 
 Ermənistanın ikinci prezidenti Robert Koçaryan bəyan edib ki, onun əlində 2008-ci ilin 1 mart hadisələrinə dair ciddi dəlil rolunda çıxış edə biləcək video-kadrlar var.

Virtualaz.org yerli KİV-ə istinadən bildirir ki, bunu Koçaryanın vəkili Ayk Alumyan keçirdiyi mətbuat konfransına deyib.

Onun sözlərinə görə, həmin kadrlarda avtobusların arxasında gizlənən aktivistlərin nümayişçilərə necə atəş açdıqları açıq-aydın görünür.

Alumyan bəyan edib ki, bu video Koçaryanla bağlı açılan cinayət işi üzrə məhkəmənin çıxardığı ilkin qətimkan tədbirindən şikayət olaraq, şəxsən sabiq prezidentin özü tərəfindən Ermənistanın Kassasiya Məhkəməsinə təqdim edilib.

Qeyd edək ki, dünən Ermənistanın Kassasiya Məhkəməsi ölkənin baş prokuroru Artur Davtyanın Koçaryana qarşı şikayətini təmin edib. Məhkəmənin qərarına əsasən, Apellyasiya Məhkəməsinin 13 avqustda Koçaryanın xeyrinə çıxardığı qətnamənin qüvvəsi dayandırılıb və təkrar baxılması üçün Koçaryanın işi yenidən Apellyasiya Məhkəməsinə yönləndirilib. Lakin sabiq prezidentin vəkili Ayk Alumyan bildirib ki, Ermənistan baş prokurorunun əsas niyyəti işin Konstitusiya Məhkəməsində baxılmasına nail olmaqdır.

Xatırladaq ki, Robert Koçaryan 2008-ci il martın 1-də ölkədə keçirilən etiraz aksiyalarının dağıdılması zamanı 10 nəfərin ölümü və ölkədə konstitusiya quruluşunu devirmək cəhdi ilə əlaqədar açılan cinayət işi çərçivəsində, həmçinin, maliyyə maxinasiyaları və pulların yuyulmasında ittiham olunur.