Cəmiyyət / Sosial

Rusiyanı tərk etməsi üçün 3 gün vaxt verildi

Rusiya Xarici İşlər Nazirliyi Norveç səfirliyinin yüksək səviyyəli diplomatlarından birini "persona non qrata” elan edib və Rusiyadakı akkreditasiyasına üç gün müddətində xitam verib.
Kanal14.az bildirir ki, bu barədə Rusiya XİN-in son açıqlamasında qeyd olunub.
"18 avqustda Rusiya diplomatını "persona non grata” elan edən Norveç səlahiyyətlilərinin dostyana olmayan qərarı ilə əlaqədar olaraq, Norveç Krallığının Moskvadakı səfiri Rune Resaland 28 avqustda Rusiya Xarici İşlər Nazirliyinə dəvət edilib və buna cavab olaraq Norveç səfirliyinin yüksək səviyyəli diplomatlarından birinin Rusiyada "arzuolunmaz şəxs” elan edildiyi bildirilib. Həmin şəxsin Rusiya Federasiyasındakı akkreditasiyasına üç gün ərzində xitam veriləcək. Norveçdəki işçimizin ölkədən çıxması üçün ayırdığı müddət də bu qədər olub”, - deyə açıqlamada vurğulanıb.
Bildirilib ki, Moskva Norveç səlahiyyətliləri tərəfindən davam etdirilən destruktiv xəttin ikitərəfli münasibətlərin atmosferinə mənfi təsir göstərəcəyinə inanır.
"Bu cür siyasətin nəticələrinə görə məsuliyyət tamamilə Osloya aiddir”, - deyə nazirlik əlavə edib.